第5章 CH.5

我屋企住系井岸，距离斗一大约6公里，一个系珠海斗门里面噶小镇，一个睇唔到海噶小镇，人系珠海竟然睇唔到海，连住都几讽刺下，坐609，三个字就到。

行到返屋企楼下都差唔多7点，丢，我都未组织好语言面对我阿爸阿妈，咁快返屋企，我点交代啊！？

交代？胶袋就有！

我当时真系唔敢返屋企，真系想搵窿捐啊。

我屋企系无小区管理噶，隔离就系斗门区教育局，我行左去教育局后面噶巷仔，疯狂扯烟，腾云驾雾，抽尽最后噶半包南洋。

我睇住由鼻哥窿喷出嚟噶二手烟，系烟雾弥漫噶后巷行嚟行去，脑海中不断谂一阵见到阿爸阿妈要讲D乜嘢，真系谂唔到讲D乜嘢好野，好野谂唔到，藉口就谂到几个：A，老豆阿妈，我唔舒服啊，考唔好啊。（见到D咁九难噶题，我系真系有D唔舒服架）;B，老豆妈子，D卷好难（呢个事实）；C，阿爸阿妈，我无乜状态（我都唔知自己嗡乜）；D，都系唔讲好过讲系啦。

要面对噶始终都要面对，死就死，刀仔锯大髀啦。

屋企住系八楼，平时爬八楼我都唔洗8分钟，两三下手势即到，今日对脚好似镶左成顿铅咁，每踏一步都好似出尽我吃奶噶力咁，连我自己都唔知用左几耐先返到屋企，打开到门。

咯，咯，两下开门锁噶声，睇嚟阿爸阿妈仲未返嚟，提到上喉咙顶噶心暂时放低左D，拖住沉重噶身体返房，放低个书包，摊尸咁摊系块地度，凉浸浸噶地面，令我发晒麻噶脑袋有了一种感觉上噶冲击，好舒服，精神顿时放松左唔少，有D想瞓觉添，就系我迷迷糊糊想搵周公吹下水个阵，一窜锁匙声响起，阿爸阿妈先后返左嚟。

我即时用左一个面向地下噶蜈蚣弹，弹左起身。

妈妈好似平时咁一入门口就叫声我，问我系咪返左嚟，我应左一声。

“嗯。”

呢一声‘嗯’都未经空气传播出去，我老豆就已经企左系我间房门口啦，速度绝对大于声音系空气中噶传播速度，轻轻敲门，单刀直入。

爸：“点啊仔？考完试啦？考得点啊？”

一秒，一秒就问左我三个问题，我都唔知点答。我无对上老豆噶目光，摇左下头，牙根紧咬，我怀疑自己有无咬到出牙血，我无办法用文字回答老豆噶问题，反应唔过嚟噶我，讲唔到野，头先地砖冷左一阵噶头脑又开始发热，D发根我系feel到全部都麻晒噶，毛孔张开，唔自在噶感觉游走系身体入边每一条神经，身体外边每一寸肌肤，思绪就好似D电线咁乱晒大笼，成个藤原拓海斗输俾须藤京一个阵踩爆AE86副引擎个样咁沮丧。

虽然无对上老豆噶目光，但系我用我噶犀利余光留意到老豆脸上有住一丝微妙噶变化，由本身噶小小兴奋一秒都唔使就变到多多噶失望，个一秒钟噶一丝失落，我瞄得清清楚楚。